Procesi gjyqësor kundër Salih Mustafës ka të bëjë me ngjarje në Zonën Operative të Llapit të UÇK-së gjatë periudhës së paraqitur në Aktakuzë. Gjykimi u zhvillua nga 15 shtatori 2021 deri më 15 shtator 2022. Më 16 dhjetor 2022, Trupi Gjykues e shpalli Mustafën fajtor për krimet e luftës të ndalimit arbitrar, torturës dhe vrasjes së paligjshme dhe e dënoi me 26 vjet burgim. Më 6 prill 2023, Trupi Gjykues urdhëroi Mustafën të paguajë 207.000 euro si zhdëmtim për viktimat. Më 14 dhjetor 2023, Paneli i Apelit uli dënimin e tij në 22 vjet burgim. Pas vendimit të Gjykatës Supreme më 29 korrik 2024, çështja iu kthye Panelit të Apelit për rishikimin e dënimit. Më 10 shtator 2024, Paneli i Apelit shqiptoi një dënim të ri me 15 vjet burgim, duke llogaritur kohën e kaluar në paraburgim. Në këtë çështje gjyqësore marrin pjesë tetë viktima.
-
-
Çështja gjyqësore e Pjetër Shalës ka të bëjë me ngjarje të cilat ndodhën midis majit dhe qershorit 1999 kundër personave që u mbajtën të ndaluar në fabrikën e metalit në Kukës, në Shqipëri. Dosja e çështjes iu kalua Trupit Gjykues I më 21 shtator 2022. Gjykimi filloi më 21 shkurt 2023 dhe përfundoi më 17 prill 2024. Më 16 korrik 2024, Trupi Gjykues e shpalli Shalën fajtor për krimet e luftës të ndalimit arbitrar, torturës dhe vrasjes së paligjshme dhe e dënoi me 18 vjet burgim, duke llogaritur kohën e kaluar në paraburgim. Më 29 nëntor 2024, Trupi Gjykues urdhëroi Shalën të paguajë 208.000 euro si zhdëmtim për viktimat. Më 14 korrik 2025, Paneli i Apelit la në fuqi verdiktet e fajësisë së Shalës për ndalim arbitrar, torturë dhe vrasje të paligjshme. Duke qenë se miratoi, pjesërisht, tri pika që Mbrojtja paraqiti në apel, Paneli i Apelit uli dënimin e tij nga 18 në 13 vjet burgim, duke llogaritur kohën e kaluar në paraburgim. Në këtë çështje gjyqësore marrin pjesë tetë viktima.