Aktuale

Pasditen e sotme, ZPS-ja thirri dëshmitarin e 56-të i cili është dëshmitar i mbrojtur me pseudonimin W04850. Sipas përmbledhjes së prokurorisë të lexuar në gjykatë, ky dëshmitar do të dëshmojë për një individ i cili ishte arrestuar nga UÇK-ja në vitin 1999 dhe që prej atëherë është i zhdukur.

Dëshmia e dëshmitarit të 55-të të ZPS-së, Ramiz Qeriqi, në gjykimin Thaçi dhe të tjerët, po vazhdon këtë mëngjes.

Transmetimi i drejtpërdrejtë i seancës aktualisht po funksionon si duhet pas problemeve fillestare teknike shkaku i të cilave pjesa e parë e seancës nuk ishte plotësisht e qasshme në transmetim të drejtpërdrejtë. Dhomat e Specializuara të Kosovës do të publikojnë për mediat dhe publikun, sa më shpejt të jetë e mundur, regjistrimin e plotë të seancës së sotme publike, përfshirë pjesën që nuk ishte e qasshme.

Aktualisht, për shkak të një problemi teknik, transmetimi i drejtpërdrejtë i seancës së sotme ka ndërprerrje. Jemi duke u përpjekur që ta zgjidhim problemin sa më shpejt të jetë e mundur.

Këtë mëngjes, Prokuroria vazhdon me marrjen në pyetje të dëshmitarit të saj të 55-të, Ramiz Qeriqi.

Dëshmitari i ri i Prokurorisë është Ramiz Qeriqi. Sipas përmbledhjes së lexuar nga ZPS-ja në gjykatë, gjatë periudhës përkatëse ky dëshmitar ka shërbyer si komandant batalioni në Brigadën 121 të UÇK-së në zonën e Pashtrikut.

Këtë mëngjes, dëshmitari i mbrojtur W04739 vazhdon dëshminë e datës 4 prill. Dëshmia po mbahet tërësisht në seancë të mbyllur.

Më 8 prill, Kryetarja e DHSK-së Ekaterina Trendafilova rrëzoi kërkesën e Hashim Thaçit për zëvendësimin e gjykatësit Nikola Giju si Gjykatës i Vetëm në çështjen me numër KSC-BC-2018-01, pas emërimit të tij si gjykatës në Gjykatën Penale Ndërkombëtare (GJPN). Kryetarja sqaroi se ajo mund t’i zëvendësojë gjykatësit vetëm në rast se gjykatësit nuk janë në gjendje të ushtrojnë detyrën e tyre për shkak të angazhimit në një veprimtari ose profesion tjetër. Nuk është kështu në rastin e gjykatësit Giju, tha ajo, pasi ai do të fillojë t’i ushtrojë detyrat e tij gjyqësore në GJPN më 19 gusht. Deri në atë kohë, ai është i disponueshëm për të ushtruar detyrat e tij në DHSK. 

Gjithashtu, Kryetarja e DHSK-së hodhi poshtë pa e shqyrtuar kërkesën alternative të Mbrojtjes për heqjen e gjykatësit Giju. Kryetarja konstatoi, ndër të tjera, se kërkesa ishte e pabazuar dhe Mbrojtja nuk paraqiti asnjë argument pse pozita gjyqësore e gjykatësit Giju në një gjykatë tjetër, që nuk ka përplasje juridiksioni me DHSK-në, mund të ndikojë në pavarësinë e tij.

Më shumë hollësi në vendimin e plotë.

Gjykimi në çështjen Thaçi dhe të tjerët përfundoi për ditën e sotme dhe për këtë javë. Gjykimi do të rinis të hënën, më 22 prill, në ora 09:00.

Këtë mëngjes, dëshmitari W04739 vazhdon dëshminë e cila po mbahet tërësisht në seancë të mbyllur.

Pas përfundimit të dëshmisë së dëshmitarit Shaun Byrnes, ka rinisur dëshmia e dëshmitarit të 54-të të ZPS-së W04739, e cila filloi dje. Dëshmia po mbahet tërësisht në seancë të mbyllur.