Aktuale

Ju njoftojmë se seancat e planifikuara për datat 14-17 prill 2026 në çështjen gjyqësore kundër Thaçit dhe të tjerëve në lidhje me akuzat për vepra penale kundër administrimit të drejtësisë, janë anuluar. Informacione të mëtejshme do të jepen sapo të jenë të disponueshme. 

Në vendimin për rishikimin e paraburgimit të 2 prillit 2026, Gjykatësi i Vetëm i ngarkuar me çështjen për administrimin e drejtësisë kundër Thaçit dhe të tjerëve, urdhëroi mbajtjen e mëtejshme në paraburgim të Hashim Thaҫit. Gjykatësi Gosnell konstatoi se vazhdon të ekzistojë rreziku real që, në qoftë se lirohet, i akuzuari mund të pengojë ecurinë e procesit dhe të kryejë vepra penale të tjera. Ky është vendimi i tetë i tillë në këtë çështje gjyqësore; të gjitha vendimet për rishikimin e paraburgimit janë të disponueshme në Dokumentacionin Gjyqësor Publik.

Transkripti i informimit javor të Dhomave të Specializuara të Kosovës i datës 02/04/2026 është tani i disponueshëm.

Pas caktimit të Panelit të Gjykatës Kushtetuese javën e kaluar, më 31 mars 2026, Paneli miratoi pjesërisht kërkesën e Mbrojtjes së Pjetër Shalës lidhur me zgjatjen e afatit për dorëzimin e referimit. Paneli e zgjati afatin kohor për dorëzimin e referimit deri më 1 qershor 2026.

Gjatë konferencës përgatitore për Mbrojtjen të mbajtur ditën e sotmë, 1 prill 2026, Gjykatësi i Vetëm, pasi dëgjoi argumentet e palëve, i udhëzoi ato që të paraqiten më 14 dhe 15 prill për dëshminë e mundshme të një dëshmitari të Mbrojtjes, si dhe vuri në dukje se javën e ardhshme nuk do të dëgjohen dëshmitarë. Rrjedhimisht, gjykimi shtyhet deri më 14 prill, varësisht prej njoftimeve të mëtejshme të Gjykatësit, dhe seancat e planifikuara deri në këtë datë anulohen. Gjatë seancës, Gjykatësi Gosnell miratoi dhe kërkesën e Fazliut për të marrë pjesë në fazën e Mbrojtjes të gjykimit përmes videokonferencës.

Ju kujtojmë se konferenca përgatitore për Mbrojtjen në çështjen gjyqësore kundër Thaçit, Smakajt, Kilajt, Fazliut dhe Kuçit për akuzat lidhur me administrimin e drejtësisë është caktuar të mbahet nga ora 14:00 deri në orën 17:30. Si dhe në seanca të tjera të ngjashme, konferenca do të transmetohet në internet me një vonesë 45-minutëshe dhe mund të ndiqet nëpërmjet kësaj lidhjeje.   

Ekipet mbrojtëse të Bashkim Smakajt dhe Hajredin Kuçit kanë dorëzuar njoftimet e tyre, ku bëjnë të ditur se nuk do të paraqesin prova në proces.
Sikurse u njoftua më herët, Mbrojtja e Hashim Thaçit dhe e Isni Kilajt kanë bërë të ditur se do të paraqesin prova, ndërsa Mbrojtja e Fadil Fazliut nuk do të paraqesë prova.  

Në përputhje me urdhrin e Gjykatësit të Vetëm të lëshuar më parë gjatë këtij muaji, ekipet e Mbrojtjes në çështjen gjyqësore kundër Thaçit dhe të tjerëve në lidhje me akuzat që kanë të bëjnë me administrimin e drejtësisë, filluan të dorëzojnë njoftimet e tyre në lidhje me paraqitjen e provave në proces. Deri më tani, njoftime ka paraqitur Mbrojtja e Hashim Thaçit, Isni Kilajt dhe Fadil Fazliut. Mbrojtja e Thaçit dhe e Kilajt bënë të ditur synimin e tyre për të paraqitur prova, ndërsa Mbrojtja e Fazliut njoftoi se nuk synon të paraqesë prova. 

Njoftimet mund t’i gjeni në këtë lidhje.

Siç tregohet në kalendarin e gjykatës, konferenca përgatitore për Mbrojtjen është caktuar të mbahet më 1 prill 2026, nga ora 14:00 deri në orën 17:30.
 

Më 27 mars 2026, Mbrojtja e Hashim Thaçit dorëzoi versionin e redaktuar publik të dosjes gjyqësore përfundimtare të saj, e cila fillimisht u dorëzua si konfidenciale më 19 janar 2026. Ajo gjendet në dokumentet publike të gjykatës.
Kjo është dosja e dytë gjyqësore përfundimtare e bërë publike deri më tani, pas asaj të dorëzuar nga Veseli, për të cilën kemi njoftuar më parë.

Më 25 mars 2026, Kryetarja Trendafilova caktoi Panelin e Gjykatës Kushtetuese për shqyrtimin e Kërkesës së Mbrojtjes së Pjetër Shalës për zgjatjen deri më 15 qershor 2026 të afatit për dorëzimin e Kërkesës Referuese, pas vendimit të Gjykatës Supreme të 9 marsit 2026. Gjykatësit Vidar Stensland, Rumen Nenkov, Pjotër Hofmanski do të vendosin në lidhje me këtë kërkesë dhe çdo parashtrim tjetër në lidhje me të.