Aktuale

Siç është njoftuar në kalendarin tonë, pushimi dimëror në DHSK fillon të hënën, më 22 dhjetor 2025, dhe përfundon më 9 janar 2026. Gjatë kësaj periudhe nuk mbahen seanca gjyqësore dhe disa nga shërbimet jothelbësore do të jenë në minimum. Megjithatë, gjykata mbetet plotësisht funksionale dhe puna vazhdon në të gjitha seksionet e DHSK-së. Gjatë pushimit mund të paraqiten parashtrime dhe përveç nëse gjykatësit kanë urdhëruar ndryshe, afatet gjyqësore vazhdojnë të jenë në fuqi.

Më 18 dhjetor 2025, Trupi Gjykues në çështjen kundër Thaçit, Veselit, Selimit dhe Krasniqit njoftoi mbylljen e procedurës së paraqitjes së provave. Trupi Gjykues ritheksoj urdhrat e tij të mëhershëm se dosjet gjyqësore përfundimtare dhe deklarata për pasojat e krimeve të pretenduara në viktimat pjesëmarrëse duhet të dorëzohen deri më 19 janar 2026. Ai gjithashtu caktoi rendin e ditës për deklaratat përmbyllëse, që janë planifikuar për t’u paraqitur nga 9 deri 13 shkurt 2026, si dhe datat e rezervuara më 16 dhe 18 shkurt, nëse është e nevojshme.

Para këtij vendimi, Trupi Gjykues hodhi poshtë kërkesën e ZPS-së për të paraqitur kundërprova, duke konstatuar se nuk ishin plotësuar kushtet për pranimin e provave të tilla. Trupi Gjykues gjithashtu hodhi poshtë kërkesën e Mbrojtjes që t’i lejojë apelimin e vendimit të mëparshëm me të cilin ishte refuzuar kërkesa për procedurë të veçantë të përcaktimit të dënimit, duke konfirmuar se çdo përcaktim i dënimit, në rast se është i zbatueshëm, do të shqyrtohet me Aktgjykimin.
 

Transkripti i informimit të sotëm javor të DHSK-së për median ndodhet këtu.

Më 11 dhjetor 2025, Kryetarja e Dhomave të Specializuara të Kosovës, Gjykatëse Ekaterina Trendafilova, vendosi që të mos ulë apo modifikojë dënimin e Haxhi Shalës pas vuajtjes së dy të tretave të tij.
Më shumë informacion mund të gjeni në komunikatën për shtyp, të bërë publike sot.

Transkripti i informimit të sotëm javor të DHSK-së për median ndodhet këtu.

Pas vendimit për vazhdimin e paraburgimit të Veselit, Selimit dhe Krasniqit, siç është njoftuar më herët këtu, Trupi Gjykues urdhëroi, më 10 dhjetor, vazhdimin e paraburgimit të Hashim Thaçit.
Ashtu si në rastin e të akuzuarve të tjerë, Trupi Gjykues konstatoi se vazhdojnë të ekzistojnë rreziqet që ai mund të pengojë ecurinë e procesit ose të kryejë vepra penale të tjera.

Më 10 dhjetor 2025, Isni Kilaj u lirua përkohësisht në Kosovë, me kushte, pas rishikimit të fundit të paraburgimit nga Gjykatësi i Vetëm në çështjen Prokurorja e Specializuar k. Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit.
Më shumë informacion mund të gjeni në komunikatën për shtyp, të bërë publike sot.

Më 5 dhjetor 2025, Paneli i Gjykatës së Apelit miratoi, me shumicë, një aspekt të apelit të Mustafës kundër vendimit të Gjykatësit të Vetëm të 16 korrikut 2025 në lidhje me pagesën e normës së interesit në lidhje me Urdhrin për Zhdëmtim. Paneli konstatoi, me mendimin pjesërisht të ndarë të Gjykatësit Pikar, se, duke urdhëruar normën e interesit për t’u paguar për shumën e papaguar të zhdëmtimit që nga shpallja e aktgjykimit, Gjykatësi i Vetëm veproi jashtë fushëveprimit të kompetencave të veta dhe, rrjedhimisht prapësoi vendimin sa i përket zbatimit të normës së interesit dhe detyrimeve për raportim lidhur me të.
Më shumë hollësi mund të gjenden në versionin e redaktuar publik të vendimit, që mund të gjendet këtu.

Më 5 dhjetor 2025, Paneli i Gjykatës së Apelit rrëzoi apelin e Fadil Fazliut kundër vendimit të pestë të Gjykatësit të Procedurës Paraprake për vazhdimin e paraburgimit të tij, të lëshuar më 3 tetor 2025.
Në ndërkohë, siç u njoftua dje, Gjykatësi i Vetëm lëshoi vendimin e gjashtë për vazhdimin e paraburgimit të Fazliut.

Më 4 dhjetor 2025, Gjykatësi i Vetëm caktoi datën për fillimin e gjykimit në çështjen kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit për të martën, 24 shkurt 2026. Sipas urdhrit, paraqitja kryesore e provave nga ZPS-ja, ku pritet të thirren tre dëshmitarë, do të zhvillohet në një bllok të vetëm deri më 6 mars 2026.
Në urdhër, të cilin mund ta gjeni këtu, gjithashtu caktohen disa afate procedurale për parashtrime nga palët.