Aktuale

Gjykatësi i procedurës paraprake Giju nxori vendimin e katërt mbi pjesëmarrjen e viktimave në çështjen Thaçi dhe të tjerët. Njëzet e një parashtrues të kërkesave u pranuan si viktima pjesëmarrëse në proces gjyqësor. Ata do të përfshihen në grupin ekzistues 1 (i cili numëronte tridhjetë e dy viktima pjesëmarrëse) dhe do të  përfaqësohen nga përfaqësuesja e njëjtë  e viktimave. Njëzetë kërkesa u refuzuan. Më shumë detaje mund të lexohen në vendim.

Sot, më 30 nëntor, Gjykatësi i Procedurës Paraprake, Nikola Giju, njoftoi Kryetaren se dosja e çështjes kundër Hashim Thaçit, Kadri Veselit, Rexhep Selimit dhe Jakup Krasniqit do të jetë gati për t’ia kaluar trupit gjykues më 15 dhjetor 2022. Rrjedhimisht, sot, Kryetarja e Dhomave të Specializuara të Kosovës caktoi trupin gjykues II në këtë çështje, në përbërje nga gjykatësit, Çarls Smith III, Kristof Barte, Genël Metro dhe Fergal Gejnor (gjykatës rezervë).

Sipas urdhrit të mëhershëm të Gjykatësit të Procedurës Paraprake, Hashim Thaçi e dorëzoi dosjen e tij paraprake, versioni i redaktuar publik i së cilës është i disponueshëm në dokumentet publike të gjykatës.

Gjatë konferencës së sotme për ecurinë e çështjes në çështjen Thaçi dhe të tjerët, Gjykatësi i Procedurës Paraprake, Nikola Giju, konfirmoi se ka ndërmend t’ia kalojë dosjen e kësaj çështjeje trupit gjykues deri në fund të këtij viti. Gjykatësi i Procedurës Paraprake tha gjithashtu se, sipas të gjitha gjasave, kjo ishte konferenca e fundit për ecurinë e çështjes në këtë çështje, përveç nëse paraqitet nevoja ndryshe.

Siç është njoftuar në kalendarin e Gjykatës, konferenca e radhës për ecurinë e çështjes në çështjen kundër Thaçit, Veselit, Selimit dhe Krasniqit do të mbahet më 4 nëntor në orën 13:30. Më shumë hollësi mund të lexoni në urdhrin për caktimin e datës.

Bazuar në vendimet e Gjykatësit të Procedurës Paraprake më 22 korrik 2022 dhe më 29 shtator 2022, Zyra e Prokurorit të Specializuar sot, më 30 shtator, dorëzoi aktakuzën  e konfirmuar të ndryshuar në çështjen kundër Thaçit, Veselit, Krasniqit dhe Selimit. Versioni i redaktuar publik i aktakuzës më të fundit është në dispozicion këtu. Më shumë informacion në lidhje me këtë çështje përfshirë historikun e aktakuzës, mund të gjeni në faqen e internetit të dedikuar për çështjen gjyqësore.

Gjykatësi i Procedurës Paraprake në çështjen Thaçi dhe të tjerët, dje, më 29 shtator, miratoi kërkesën e Prokurorit të Specializuar për tërheqjen e pretendimeve për krime në komunën e Ferizajt. Duke kujtuar se ZPS-ja ishte urdhëruar më parë që të ndryshojë aktakuzën aktuale deri më 30 shtator 2022, Gjykatësi i Procedurës Paraprake, në interes të efikasitetit, urdhëroi ZPS-në që të pasqyrojë këtë tërheqje të akuzave në aktakuzën e ndryshuar më tej, e cila ende mbetet për t'u dorëzuar brenda afatit të njëjtë (e premte, 30 shtator 2022). Këtu është vendimi i plotë.

Më 26 gusht 2022, Gjykatësi i Procedurës Paraprake në çështjen gjyqësore Thaçi dhe të tjerë rrëzoi kërkesat e paraqitura nga ekipet e Mbrojtjes së Thaçit dhe të Krasniqit në lidhje me mospërmbushjen e pretenduar të detyrimeve për nxjerrjen e materialeve nga ZPS-ja. Gjykatësi Giju konstatoi se kërkesat e Mbrojtjes nuk përbëjnë mospërmbushje të detyrimeve të ZPS-së për nxjerrjen e materialeve sipas rregullës 103 të Rregullores, por megjithatë e nxiti fuqimisht Zyrën e Prokurorit të Specializuar që t’u përmbahet detyrimeve për nxjerrjen e materialeve shfajësuese dhe t’i japë përparësi nxjerrjes së tyre mbi afatet dhe materialet e tjera me të cilat po punon paralelisht. Gjithashtu, ZPS-ja u urdhërua që, deri më 7 tetor, të dorëzojë një raport mbi nxjerrjen, ku të shpjegojë vështirësitë që ka hasur në përmbushjen e detyrimeve për nxjerrjen e materialeve sipas rregullës 103. Më shumë hollësi do të gjeni në versionin e redaktuar të vendimit, protokolluar më 13 shtator.

Sikurse u  bë e ditur në Kalendarin e Gjykatës, konferenca e radhës mbi ecurinë në çështjen kundër Thaçit, Veselit, Selimit dhe Krasniqit është planifikuar për 8 shtator në ora 13.30. Më shumë hollësi mund të gjeni në urdhrin për caktimin.

Më 22 gusht 2022, Paneli i Gjykatës së Apelit hodhi poshtë apelin më të fundit nga Hashim Thaçi kundër vendimit të Gjykatësit të Procedurës Paraprake, në të cilin urdhërohet vazhdimi i paraburgimit të tij.