Aktuale

Më 13 maj 2025, Gjykatësi i Procedurës Paraprake në çështjen Thaçi dhe të tjerët i refuzoi kërkesat për lirimin e përkohshëm të Kadri Veselit, Rexhep Selimit dhe Jakup Krasniqit. Versionet e redaktuara publike të vendimeve mund t’i gjeni në dokumentacionin gjyqësor publik të DHSK-së.

Më 5 qershor 2025, Trupi Gjykues në çështjen Thaçi dhe të tjerët lëshoi ​​një urdhër të rishikuar lidhur me caktimin e hapave të ardhshëm në këtë procedurë. Në vendimin e tij më të fundit mbi pranimin e provave të ZPS-së, të dorëzuar në mënyrë konfidenciale më 29 maj të këtij viti, Trupi Gjykues urdhëroi ekipet e Mbrojtjes të dorëzojnë mocionin e përbashkët në përputhje me rregullën 130, deri më 12 qershor, ndërsa ZPS-ja u urdhërua të dorëzojë përgjigjen e saj deri më 14 korrik. Megjithatë, në vendimin e sotëm, Trupi Gjykues e gjeti të përshtatshme, proprio motu (me iniciativën e vet), të zvogëlojë afatin kohor për përgjigjen e ZPS-së më 7 korrik. Trupi Gjykues theksoi se aktualisht synon të nxjerrë vendimin e tij sipas rregullës 130 në javën që fillon më 14 korrik. Nëse Trupi Gjykues e refuzon mocionin e Mbrojtjes sipas rregullës 130 tërësisht ose pjesërisht, Mbrojtësi i Viktimave urdhërohet të përgatitet për të thirrur dëshmitarët e tij më 16 korrik, ndërsa ekipet e Mbrojtjes duhet të njoftojnë nëse synojnë të dorëzojnë provat e tyre deri më 16 korrik. Për më tepër, Trupi Gjykues aktualisht synon të mbajë Konferencën Përgatitore të Mbrojtjes në javën që fillon më 21 korrik.

Më shumë detaje mund të lexohen në vendimin e Trupit Gjykues, ndërsa publikimi ynë i mëparshëm lidhur me urdhrin e Trupit Gjykues në prill është i disponueshëm këtu.

Më 4 qershor 2025, Trupi Gjykues II nxori vendimin më të fundit mbi pjesëmarrjen e viktimave në çështjen Thaçi dhe të tjerët. Një parashtrues i kërkesës që u pranua si viktimë pjesëmarrëse në proces gjyqësor do t’i shtohet grupit ekzistues të viktimave në këtë çështje dhe do të përfaqësohet nga i njëjti mbrojtës i viktimave. Në vendimin e tij Trupi Gjykues theksoi se afati për paraqitjen e kërkesave për pranimin e viktimave pjesëmarrëse në këtë çështje ka skaduar më 15 shkurt 2023, por, meqenëse ekziston një arsye e vlefshme, e pranoi këtë kërkesë.

Bashkë me të, numri i gjithsejtë i viktimave pjesëmarrëse në këtë çështje gjyqësore arrin në 157. Më shumë detaje në versionin e redaktuar publik të vendimit.

Më 15 maj 2025, Trupi Gjykues II nxori vendimin më të fundit mbi pjesëmarrjen e viktimave në çështjen Thaçi dhe të tjerët. Katër parashtrues të tjerë kërkesash u pranuan si viktima pjesëmarrëse në proces gjyqësor, të cilët do t’i shtohen grupit ekzistues të viktimave në këtë çështje dhe do të përfaqësohen nga i njëjti mbrojtës viktimash. Në vendimin e tij Trupi Gjykues theksoi se afati për paraqitjen e kërkesave për pranimin e viktimave pjesëmarrëse në këtë çështje ka skaduar më 15 shkurt 2023, por, meqenëse ekziston një arsye e vlefshme ka vendosur ti pranojë këto kërkesa ndërsa ka refuzuar një kërkesë ngase nuk ekziston një arsye e vlefshme.

Bashkë me këta, numri i gjithsejtë i viktimave pjesëmarrëse në këtë çështje gjyqësore arrin në 156. Më shumë detaje në versionin e redaktuar publik të vendimit.

Më 23 prill 2025, Trupi Gjykues në çështjen Thaçi dhe të tjerët vendosi në lidhje me kërkesën e një personi për tërheqjen nga statusi si viktimë pjesëmarrëse në proces për arsye të sigurisë. Pas konstatimit se kërkesa ishte nënshkruar si duhej dhe se nuk kishte asnjë tregues se kërkesa nuk ishte bërë me vullnet të lirë dhe në mënyrë plotësisht të vetëdijshme, Trupi Gjykues e miratoi kërkesën duke e përfunduar statusin e personit si viktimë pjesëmarrëse në proces.

Më herët më 14 prill, Mbrojtësi i Viktimave informoi Trupin Gjykues për ndarjen nga jeta të një viktime në këtë çështje gjyqësore. Si rezultat, aktualisht numri i gjithsejtë i viktimave pjesëmarrëse në këtë çështje gjyqësore është 152.

Informacion i mëtejshëm për pjesëmarrjen e viktimave në këtë çështje gjyqësore mund të gjendet në rubrikën  çështje gjyqësore dhe në një faqe tjetër në faqen tonë në internet specifikisht për viktimat pjesëmarrësve në të gjitha çështjet gjyqësore.

Gjatë konferencës së sotme për ecurinë e çështjes, Trupi Gjykues II dha disa urdhra gojorë në lidhje me provat dhe fazat e ardhshme të procesit. Ndër të tjera, Trupi Gjykues urdhëroi ekipet e Mbrojtjes të dorëzojnë mocionin e përbashkët të tyre për rrëzimin e akuzave, në përputhje me rregullën 130, deri më 2 qershor 2025, ose brenda 14 ditësh pas vendimit të fundit të Trupit Gjykues për pranimin e provave, cilado të jetë data më e vonshme. Përgjigja e ZPS-së duhet të dorëzohet deri më 1 korrik, ose brenda 30 ditësh pas Mocionit të Mbrojtjes sipas Rregullës 130, cilado të jetë data më e vonshme.

Gjithashtu, mbrojtësi i viktimave pritet që të jetë gati për paraqitjen e provave të veta në korrik, në qoftë se Trupi Gjykues konstaton se ekziston arsyeja për këtë, dhe, ndër të tjera, u urdhërua të dorëzonte listën e tij të dëshmitarëve dhe provave materiale të propozuara deri më 28 maj 2025.

Trupi Gjykues ka anuluar planin e punës së gjykatës deri më 8 maj, duke e shtyrë këtë gjykim deri në njoftimin e ardhshëm.

Ju kujtojmë se konferenca për ecurinë e çështjes në çështjen gjyqësore kundër Thaçit, Veselit dhe Krasniqit mbahet mëngjesin e sotëm, në orën 10:00. Ashtu si edhe në rastet e tjera, transmetimi me video në internet i kësaj seance gjyqësore është me 45 minuta vonesë. Klikoni këtu për të ndjekur transmetimin e drejtpërdrejtë në gjuhën shqipe.

Më 16 prill 2025, të gjitha ekipet e Mbrojtjes e informuan Trupin Gjykues për synimin e tyre për të dorëzuar mocione për rrëzimin e disa, apo të gjitha akuzave në aktakuzë, në përputhje me Rregullën 130 të Rregullores. Përveç kësaj, ekipet e Mbrojtjes kanë bërë të ditur se do ta informojnë Trupin Gjykues nëse synojnë të paraqesin çështjet e tyre pas vendimit lidhur me mocionet sipas Rregullës 130.

Më 15 prill 2025, ZPS-ja dorëzoi njoftimin se ka mbyllur çështjen e vet kundër Thaçit dhe të tjerëve. Komunikata për shtyp e ZPS-së, e lëshuar këtë mëngjes, mund të shihet këtu

Më 11 prill 2025, Gjykata e Apelit nxori vendimin me të cilin hodhi poshtë apelin e dorëzuar nga Mbrojtja e Veselit dhe Krasniqit. Apeli kundërshtoi urdhrin gojor të Trupit Gjykues të datës 5 dhjetor 2024, i cili kishte refuzuar një kundërshtim lidhur me përdorimin e një deklarate të një dëshmitari, j cili nuk ka dëshmuar, gjatë marrjes në pyetje të dëshmitarit Sokol Bashota nga Trupi Gjykues.

Paneli i Apelit përsëriti diskrecionin e gjerë që i jepet Trupit Gjykues sipas Rregullores, duke përfshirë të drejtën për të marrë në pyetje dëshmitarët për çështje që nuk janë ngritur nga palët. Ndër përfundimet e veta, Paneli i Apelit përcaktoi se gjatë marrjes në pyetje, Trupi Gjykues po vlerësonte besueshmërinë ose kërkonte sqarime nga një dëshmitar dhe se nuk ishte vërtetuar ndonjë dëm konkret.

Ky është një vendim tjetër lidhur me kundërshtimet e Mbrojtjes për marrjen në pyetje të dëshmitarëve nga Trupi Gjykues. Dy vendimet e mëparshme janë përmendur në përditësimin tonë më të fundit.