Aktuale

Më 25 korrik 2025, Kryetarja Ekaterina Trendafilova caktoi Panelin e Gjykatës Supreme për të vendosur mbi mocionin e Pjetër Shalës për zgjatje të afatit dhe shtimit të numrit të fjalëve për kërkesën e tij për mbrojtje të ligjshmërisë. Gjykatësit, Ekaterina Trendafilova (kryetare), Kristinë van den Vajngart, dhe Daniel Fransen do të vendosin në lidhje me këtë mocion dhe, kur të dorëzohet, mbi vetë kërkesën për mbrojtje të ligjshmërisë dhe çështje të lidhura më të.

Transkripti i informimit të sotëm javor të DHSK-së për median ndodhet këtu.

Ju informojmë se transkripti i plotë në anglisht i seancës gjyqësore të mbajtur më 16 korrik, i cili përmban vendimin gojor lidhur me mocionin e Mbrojtjes sipas rregullës 130, është i disponueshëm në Dokumentacionin Gjyqësor Publik.

*Përditësim (23/07/2025): ndërkohë, u publikua transkripti në gjuhën shqipe, i cili mund të shihet këtu.

Transkripti i informimit të sotëm javor të DHSK-së për median ndodhet këtu.

Më 16 korrik 2025, gjykatësi i vetëm Biti lëshoi vendimin në lidhje me zbatimin e urdhrit për zhdëmtim në çështjen Salih Mustafa. Gjykatësi konstatoi se Mustafa nuk ka përmbushur detyrimet e tij sipas urdhrit për zhdëmtim dhe urdhëroi që të llogaritet norma vjetore e interesit mbi shumën e papaguar të zhdëmtimit. Kjo normë e interesit do të llogaritet nga data kur vendimi i dorëzohet Mustafës dhe do të vazhdojë derisa urdhri për zhdëmtim të zbatohet plotësisht. 

Gjykatësi gjithashtu urdhëroi Administratoren e gjykatës të dorëzojë raporte vjetore mbi këtë çështje, duke filluar një vit nga data e dorëzimit të vendimit Mustafës dhe çdo vit më pas. Obligimi për të raportuar do të mbetet në fuqi derisa të paguhet shuma e plotë e zhdëmtimit dhe norma e interesit.

Ky vendim pason konstatimet e mëhershme të gjykatësit të vetëm të datës 16 dhjetor 2024, të bëra publike më 15 korrik 2025, të cilat trajtuan mosrespektimin e mëparshëm nga Mustafa të urdhrit për zhdëmtim. Vendimi mund të shihet këtu.

Seanca e sotme ka përfunduar pas marrjes në pyetje nga Mbrojtja dhe Trupi Gjykues të dëshmitareve eksperte të thirrura nga Mbrojtësi i Viktimave. Gjykimi ka përfunduar për këtë javë, ndërsa seanca e radhës është planifikuar për 22 korrik, kur do të mbahet konferenca për ecurinë e çështjes.

Më 16 korrik 2025, ekipet e Mbrojtjes së Hashim Thaçit dhe Jakup Krasniqit informuan Trupin Gjykues se synojnë të dorëzojnë provat e tyre. Ekipet e Mbrojtjes së Kadri Veselit dhe Rexhep Selimit njoftuan se nuk synojnë të dorëzojnë prova.

Këtë mëngjes, ekipet e Mbrojtjes vazhduan marrjen në pyetje të dëshmitareve eksperte të thirrura nga Mbrojtësi i Viktimave. Aktualisht, ekipi i Mbrojtjes së Hashim Thaçit po u parashtron pyetje dëshmitareve.

Pas shpalljes së vendimit të trupit gjykues sipas Rregullës 130, Mbrojtësi Viktimave filloi paraqitjen e provave këtë mëngjes. Dy dëshmitaret e thirrura, Karin Duhne-Prinsen dhe Dr. Catherine Nicola Black, janë dëshmitare eksperte dhe po dëshmojnë mbi dëmin psikiatrik/psikologjik të viktimave në këtë çështje.

Gjatë seancës së sotme gjyqësore, Trupi Gjykues II rrëzoi mocionin e përbashkët të Mbrojtjes për hedhjen poshtë të akuzave në bazë të rregullës 130 të Rregullores. Sipas Trupit Gjykues, mocioni i Mbrojtjes kundërshton vetëm një aspekt të provave të ZPS-së – konkretisht, nëse ka ekzistuar konflikt i armatosur në Kosovë para fundit të majit 1998 dhe pas 20 qershorit 1999. Trupi Gjykues arriti në përfundimin se, sipas Rregullores, nuk ka kompetenca për të rrëzuar aspekte të tilla në këtë fazë të procesit dhe shtoi se aspektet në lidhje me kuadrin kohor të konfliktit të armatosur do të trajtohen në aktgjykimin e formës së prerë.

DHSK-ja do të ofrojë videon dhe/ose transkriptin e plotë të seancës së sotme gjyqësore, përfshirë vendimin gojor të Trupit Gjykues, sa më shpejt që të jetë e mundshme.