Aktuale

Më 17 prill 2025, Dhoma e Specializuar e Gjykatës Kushtetuese lëshoi aktvendimin në lidhje me kërkesën referuese të Salih Mustafës, ku konstatoi se nuk kishte shkelje të Kushtetutës së Kosovës apo të Konventës Evropiane për Mbrojtjen e Të Drejtave të Njeriut dhe Lirive Themelore.

Transkripti i informimit të sotëm javor të DHSK-së për median ndodhet këtu.

Arkivi i të gjitha informimeve të mëparshme është i disponueshëm në këtë faqe ndërsa video incizimet mund të gjenden në kanalin tonë në Youtube

Ashtu siç urdhëroi gjykatësja e procedurës paraprake dy ditë më parë, Zyra e Prokurorit të Specializuar sot, më 16 prill, dorëzoi aktakuzën  e konfirmuar të ndryshuar në çështjen kundër Thaçit, Smakajt, Kilajt, Fazliut dhe Kuçit. Parashtrimi specifikon se ndryshimet ndodhen në paragrafët 43 dhe 46 në lidhje me akuzat 1 deri në 3.

Më 16 prill 2025, të gjitha ekipet e Mbrojtjes e informuan Trupin Gjykues për synimin e tyre për të dorëzuar mocione për rrëzimin e disa, apo të gjitha akuzave në aktakuzë, në përputhje me Rregullën 130 të Rregullores. Përveç kësaj, ekipet e Mbrojtjes kanë bërë të ditur se do ta informojnë Trupin Gjykues nëse synojnë të paraqesin çështjet e tyre pas vendimit lidhur me mocionet sipas Rregullës 130.

Më 15 prill 2025, ZPS-ja dorëzoi njoftimin se ka mbyllur çështjen e vet kundër Thaçit dhe të tjerëve. Komunikata për shtyp e ZPS-së, e lëshuar këtë mëngjes, mund të shihet këtu

Më 27 mars 2025, gjykatësja e vetme Marzhori Masëlo refuzoi kërkesën e Haxhi Shalës për lirimin e përkohshëm në Kosovë. Gjykatësja Masëlo konstatoi se Shala nuk ka demonstruar se ekzistonin arsye të jashtëzakonshme dhe humanitare bindëse që përligjnin lirimin e përkohshëm të tij. Versionin e redaktuar publik të këtij vendimi, të dorëzuar më 15 prill, mund ta gjeni këtu.

Siç kemi informuar më herët, Shalës i ishte lejuar një vizitë nën mbikëqyrje në tetor të vitit të kaluar.

Korniza ligjore e Dhomave të Specializuara të Kosovës u mundëson personave të paraburgosur që të bëjnë kërkesa për vizitë nën mbikëqyrje në Kosovë kur ka arsye humanitare bindëse. Gjykatësit përkatës vendosin për çdo kërkesë të tillë duke u bazuar në informacionin e dhënë në momentin kur bëhet kërkesa.

Pas vendimit të Gjykatës së Apelit, për të cilin kemi informuar më herët këtë muaj, dje më 14 prill 2025, Gjykatësja e Procedurës Paraprake Masëlo, ndryshoi vendimin e saj të mëparshëm për konfirmimin e aktakuzës në këtë çështje gjyqësore. Gjykatësja Masëlo konfirmoi një formë përgjegjësie penale shtesë për Hashim Thaçin në bazë të nenit 32(3) të Kodit Penal të Kosovës në akuzat e paraqitura në Pikat 1, 2, dhe 3 të Aktakuzës së Konfirmuar dhe urdhëroi ZPS-në të dorëzojë aktakuzën e re të konfirmuar deri më 16 prill 2025, në orën 12:00.

Sipas gjykatëses Masëlo, nuk është e nevojshme që të mbahet një seancë vijuese e paraqitjes së parë për Thaçin, sepse nuk janë shtuar akuza të reja por vetëm një formë shtesë e përgjegjësisë penale për veprën penale ekzistuese. Megjithatë ajo tha se qëndrimi i të akuzuarit në lidhje me këtë duhet të përfshihet zyrtarisht në dokumentacion, dhe e ftoi atë të vetëdeklarohet në lidhje me formën shtesë të nxitjes që u konfirmua rishtas. Në qoftë se vendos të bëjë vetëdeklarim, ai duhet ta dorëzojë atë me shkrim deri më 24 prill, në orën 16:00. Në qoftë se vendos të mos e ushtrojë këtë të drejtë, Gjykatësja e Procedurës Paraprake do të bëjë deklarimin në emër të tij si i pafajshëm, në përputhje me rregullën 92(2)(f) të Rregullores.

Në qoftë se Thaçi dëshiron të informohet për këtë formë të re të përgjegjësisë penale në seancë gjyqësore të hapur, duhet të paraqesë kërkesë për këtë deri më 24 prill, në orën 16:00.

Gjithashtu, gjykatësja Masëlo caktoi datën për dorëzimin e mocioneve paraprake nga të akuzuarit në këtë çështje, nëse kanë, deri më 8 maj 2025.

Vendimin e plotë mund ta gjeni këtu.

Më 11 prill 2025, Gjykata e Apelit nxori vendimin me të cilin hodhi poshtë apelin e dorëzuar nga Mbrojtja e Veselit dhe Krasniqit. Apeli kundërshtoi urdhrin gojor të Trupit Gjykues të datës 5 dhjetor 2024, i cili kishte refuzuar një kundërshtim lidhur me përdorimin e një deklarate të një dëshmitari, j cili nuk ka dëshmuar, gjatë marrjes në pyetje të dëshmitarit Sokol Bashota nga Trupi Gjykues.

Paneli i Apelit përsëriti diskrecionin e gjerë që i jepet Trupit Gjykues sipas Rregullores, duke përfshirë të drejtën për të marrë në pyetje dëshmitarët për çështje që nuk janë ngritur nga palët. Ndër përfundimet e veta, Paneli i Apelit përcaktoi se gjatë marrjes në pyetje, Trupi Gjykues po vlerësonte besueshmërinë ose kërkonte sqarime nga një dëshmitar dhe se nuk ishte vërtetuar ndonjë dëm konkret.

Ky është një vendim tjetër lidhur me kundërshtimet e Mbrojtjes për marrjen në pyetje të dëshmitarëve nga Trupi Gjykues. Dy vendimet e mëparshme janë përmendur në përditësimin tonë më të fundit.

Më 19 mars 2025, Trupi Gjykues në çështjen Thaçi dhe të tjerët refuzoi kërkesën e gjashtë të Hashim Thaçit për lirimin e përkohshëm për arsye humanitare për të marrë pjesë në varrimin e babait të tij. Sipas mendimit të Trupit Gjykues, vizita nën ruajtje gjatë varrimit dhe ceremonive përkujtimore publike, do të kishte shkaktuar shqetësime të konsiderueshme për sigurinë. Trupi Gjykues konstatoi se këto rreziqe do të zvogëloheshin sa duhet në qoftë se vizita kryhej pas varrimit. Vendimi i redaktuar publik i këtij vendimi, i dorëzuar më 7 prill, mund të shihet këtu.

Para dhe pas këtij vendimi, i njëjti Trup Gjykues ka miratuar dy vizita nën ruajtje në muajin mars, ndërsa i ka refuzuar dy vizita në janar dhe shkurt të këtij viti. Lidhjet drejt këtyre vendimeve mund t’i gjeni në vijim: kërkesa e 3-të; kërkesa e 4-të; kërkesa e 5-të; kërkesa e 7-të.

Korniza ligjore e Dhomave të Specializuara të Kosovës u mundëson personave të paraburgosur që të bëjnë kërkesa për vizitë nën mbikëqyrje në Kosovë kur ka arsye humanitare bindëse. Gjykatësit përkatës vendosin për çdo kërkesë të tillë duke u bazuar në informacionin e dhënë në momentin kur bëhet kërkesa.

Transkripti i informimit të sotëm javor të DHSK-së për median ndodhet këtu.