Aktuale

Pas shpalljes së Aktgjykimit, Trupi Gjykues II vendosi që të zhvillojë procesin në lidhje me zhdëmtimet dhe të lëshojë urdhër për zhdëmtim në çështjen gjyqësore Thaçi dhe të tjerët sipas nenit 22(8) të Ligjit dhe rregullës 168 të Rregullores dhe nuk do t’i referojë viktimat për padi civile në Kosovë, në qoftë se nuk do të paraqiten kundërshtime nga Mbrojtja. Këto kundërshtime duhet të paraqiten deri më 22 shtator, ndërsa përgjigjet e Mbrojtjes së Viktimave dhe të ZPS-së duhet të dorëzohen deri më 25 shtator.
Trupi Gjykues gjithashtu urdhëroi Mbrojtjen e Viktimave të dorëzojë kërkesën për zhdëmtime deri më 14 tetor, ndërsa ZPS-ja dhe ekipet e Mbrojtjes duhet t’i dorëzojnë përgjigjet ndaj saj deri më 4 nëntor 2026.
Më shumë hollësi, përfshirë edhe lidhur me afatet e tjera të caktuara nga Trupi Gjykues, mund të gjeni në urdhër.

Trupi Gjykues sot shqiptoi aktgjykimin në çështjen gjyqësore të Hashim Thaçit, Kadri Veselit, Rexhep Selimit dhe Jakup Krasniqit. Trupi Gjykues konstatoi se të katër të akuzuarit ishin penalisht përgjegjës për krimet e luftës të ndalimit arbitrar kundër 385 personave, trajtimit mizor kundër 49 personave, torturës kundër 303 personave dhe vrasjes së paligjshme kundër 96 personave.

Trupi Gjykues i shpalli të akuzuarit të pafajshëm për krime kundër njerëzimit pasi Prokurori i Specializuar nuk arriti të vërtetonte jashtë dyshimit të arsyeshëm se ishte kryer sulm i përhapur gjerësisht ose sistematik kundër një popullate civile. Gjithashtu të akuzuarit u shpallën të pafajshëm në lidhje me një numër incidentesh krime lufte.

Trupi Gjykues dënoi Hashim Thaҫin me 25 vjet burgim, Kadri Veselin me 18 vjet burgim, Rexhep Selimin me 13 vjet burgim dhe Jakup Krasniqin me 25 vjet burgim, duke llogaritur edhe kohën e kaluar në paraburgim.

Më shumë hollësi në Komunikatën për shtyp.

Pas përgjigjeve dhe komenteve të palëve gjatë seancës së sotme, deklaratat përmbyllëse përfunduan dhe gjykatësi Gosnell e deklaroi të mbyllur gjykimin kundër Thaçit, Smakajt, Kilajt, Fazliut dhe Kuçit në bazë të rregullës 136 të Rregullores së DHSK-së.
Data për shqiptimin e Aktgjykimit do të shpallet më vonë.
Më shumë informacion për çështjen gjyqësore do të gjeni në faqen përkatëse të internetit.

Sot në mëngjes vazhdoi dhe përfundoi deklarata përmbyllëse e Mbrojtjes së Smakajt, pas së cilës vijuan ekipet e Mbrojtjes së Kilajt, Fazliut dhe Kuçit. Duke përfshirë Mbrojtjen e Thaçit, e cila e përfundoi deklaratën e përmbyllëse dje, tanimë të gjitha ekipet e Mbrojtjes kanë përfunduar parashtrimet e tyre, me të cilat i kërkuan Gjykatësit të Vetëm për Gjykimin e Çështjes që t’i shpallë klientët e tyre të pafajshëm për të gjitha pikat e Aktakuzës.
Seanca përfundoi për sot. Gjykatësi i Vetëm për Gjykimin e Çështjes vendosi që seanca të vazhdojë të hënën, 14 shtator, në orën 09:30, kur do të vijohet me përgjigjet dhe komentet e palëve.

Këtë pasdite paraqiti deklaratën përmbyllëse Mbrojtja e Thaçit, pas së cilës filluan parashtrimet e Mbrojtjes së Bashkim Smakajt. Seanca e sotme përfundoi dhe do të rifillojë nesër në orën 09:30.

Transkripti i informimit javor të Dhomave të Specializuara të Kosovës i datës 10/09/2026 është tani i disponueshëm.

ZPS-ja përfundoi sot deklaratën përmbyllëse në të cilën i kërkoi Gjykatësit të Vetëm për Gjykimin e Çështjes t’i shpallë që të pestë të akuzuarit fajtorë për të gjitha pikat e Aktakuzës. Ajo kërkoi dënim me gjashtë vjet burgim për Hashim Thaçin (që, sipas ZPS-së, duhet të kryhet në vijim të dënimit që mund t’i jepet në çështjen tjetër gjyqësore kundër tij, në qoftë se do t’i jepet dënim), tre vjet secili për Bashkim Smakajn, Fadil Fazliun dhe Isni Kilajn, dhe nëntë muaj për Hajredin Kuçin. Mbrojtja e Thaçit do të fillojë deklaratën përmbyllëse pas pushimit të drekës.

Zyra e Prokurorit të Specializuar ka filluar paraqitjen e deklaratës përmbyllëse të saj në çështjen kundër Thaçit, Smakajt, Kilajt, Fazliut dhe Kuçit. Sipas urdhrit për caktimin e datës, ZPS-ja ka tri orë për parashtimet e saj, e më pas vijojnë pesë ekipet e Mbrojtjes. 

Për kujtesë, deklaratat përmbyllëse në çështjen kundër Thaçit, Smakajt, Kilajt, Fazliut and Kuçit do të fillojnë sot në mëngjes, në orën 9:30. Ashtu si në rastet e tjera, seanca do të transmetohet me 45 minuta vonesë. Klikoni këtu për ta përcjellë transmetimin në gjuhën shqipe.

Më 7 shtator 2026, Gjykatësi i Vetëm i ngarkuar me Gjykimin e Çështjes lëshoi urdhrin në të cilin paraqet rendin e ditës për deklaratat përmbyllëse në çështjen gjyqësore Thaçi dhe të tjerët në lidhje me akuzat kundër administrimit të drejtësisë, që ishin planifikuar më herët të mbaheshin më 10, 11 dhe 14 shtator. Në urdhër i jepen  tri orë ZPS-së dhe nga 45 minuta deri në dy orë ekipeve të Mbrojtjes për fjalën e tyre përmbyllëse. Seancat do të fillojnë në orën 09:30 dhe mund të vazhdojnë deri në orën 17:15.