Dejvid Shvendiman (David Schwendiman) shërbeu në postin e Prokurorit të Specializuar që nga 1 shtatori 2016, datë kur Task Forca Hetimore Speciale (TFHS) u shndërrua në Zyrën e Prokurorit të Specializuar (ZPS), deri më 31 mars 2018, pasi kishte qenë kryeprokuror në TFHS që nga maji i vitit 2015.

Z. Shvendiman ishte më parë prokuror federal i SHBA-së dhe zëvendëskryeprokuror dhe shef i Departamentit Special për Krime Lufte në Bosnjë-Hercegovinë. Përpara se t’i bashkohej TFSH-së, ai kishte punuar në Kabul, Afganistan, si ndihmësinspektor i përgjithshëm special/Drejtor i Planifikimit Paraprak nën Inspektorin e Përgjithshëm Special për Rindërtimin e Afganistanit dhe, para kësaj, si atashe i Departamentit të Drejtësisë së SHBA-së në ambasadën amerikane.

Nga viti 2006 deri në 2009 z. Shvendiman ishte prokuror ndërkombëtar në Departamentin Special për Krime Lufte në Zyrën e Prokurorit në Bosnjë-Hercegovinë, ku hetoi dhe ndoqi penalisht krimet e luftës dhe krimet kundër njerëzimit të kryera në Bosnjë-Hercegovinë gjatë luftës së Bosnjës 1992-1995. Nga nëntori 2007 deri në fund të vitit 2009 ishte zëvendës kryeprokuror dhe shef i Departamentit Special për Krime Lufte.

Z. Shvendiman përfaqësoi Prokurorin e Përgjithshëm të SHBA-së në planifikimin, përgatitjen dhe zbatimin e masave të sigurisë në tri Lojëra Olimpike – në Sidni 2000, Solt Lejk Siti 2002 dhe Athinë 2004. Ai ka kryer gjithashtu detyra të shumta për Departamentin e Drejtësisë të SHBA-së në Bahrein, Bangladesh, Tajlandë dhe Vietnam.

Z. Shvendiman e filloi karrierën e tij si prokuror në Zyrën e Prokurorit të Përgjithshëm në shtetin Utah, në vitin 1976.  Ai u kthye në Zyrën e Prokurorit të Përgjithshëm në Utah në vitin 1984, pas kishte punuar si këshilltar juridik në sistemin e drejtësisë së marinës ushtarake të SHBA-së, ku mori gradën nënkomandant. Ai iu bashkua Departamentit të Drejtësisë së SHBA-së si ndihmësprokuror rajoni në shtetin Utah në vitin 1986, ku kreu funksione të ndryshme, ndër të tjera edhe si avokat i lartë gjyqësor, ndihmës i parë i kryeprokurorit dhe kryeprokuror i përkohshëm në rajonin e Utah-ut, para se të pensionohej nga Departamenti i Drejtësisë i SHBA-së në vitin 2014.

Z. Shvendiman u diplomua në Fakultetin Juridik të Universitetit të Utah-ut (sot Fakulteti Juridik S.J. Quinney) në vitin 1976, ku ka punuar si profesor i jashtëm i së drejtës që prej vitit 1994.