Aktuale

Dëshmitari i ri i ZPS-së, Sokol Dobruna, ka nisur dëshminë e tij këtë mëngjes. Kjo dëshmi po bëhet përmes videolidhjes ndërsa dëshmitari ndihmohet nga një mbrojtës kujdestar në vendin e dhënies së dëshmisë. Siç ka njoftuar kryetari i trupit gjykues, dëshmia e këtij dëshmitari, përveç nëse vendoset ndryshe, do t'i përmbahet orarit të modifikuar që përfundon çdo ditë në ora 12:30. Përveç kësaj, trupi gjykues ka udhëzuar që, pas rekomandimit të Zyrës së DHSK-së për Mbrojtjen dhe Mbështetjen e Dëshmitarëve, të gjitha palët duhet të zbatojnë qasjen e përshtatur të pyetjeve për këtë dëshmitar kurdo që është e mundur. Kjo përfshin ritmin e marrjes në pyetje për të lehtësuar kujtesën e dëshmitarit dhe për të minimizuar pyetjet e përsëritura ose orientuese.

Pas përfundimit të dëshmisë së dëshmitarit Goodwin, gjykimi në çështjen Thaçi, Veseli, Selimi dhe Krasniqi përfundoi për ditën e sotme. Gjykimi rinis nesër, 14 janar, në ora 09:00.

Dëshmitari i ri i ZPS-së, William Goodwin, ka filluar dëshminë e tij këtë mëngjes. Ky është dëshmitar ekspert dhe është dëshmitari i 111-të i ZPS-së deri më tani në gjykatë.

Për shkak të një problemi teknik, mund të keni hasur në vështirësi me qasjen në transmetimin në internet të minutave të para të seancës së mëngjesit. Kërkojmë ndjesë për çdo shqetësim që mund të ketë shkaktuar për shikuesit e transmetimit.

Transkripti i plotë i kësaj seance bashkë me videon do të publikohen në kanalin Youtube dhe në faqen tonë të internetit, sa më shpejt të jetë e mundur.

Pas ftesës së gjykatëses së procedurës paraprake në konferencën për ecurinë e çështjes më 17 dhjetor, Hashim Thaçi u deklarua lidhur me fajësinë në formë të shkruar më 6 janar 2025. Ai u vetëdeklarua i pafajshëm për të gjitha pikat e aktakuzës.

Paneli i Gjykatës Kushtetuese, i përbërë nga gjykatësit Vidar Stensland, Rumen Nenkov dhe Romina Inkuti, ka bërë sot publik vendimin mbi referimin më të fundit të Hashim Thaçit në lidhje me disa shkelje të pretenduara të të drejtave të tija themelore.  Referimi kishte të bënte me regjimin e masave hetimore të posaçme të vendosura nga Gjykatësi i Vetëm ndaj të akuzuarit gjatë paraburgimit vitin e kaluar.

Thaçi pretendoi se me vendosjen e masave ishin shkelur nene të caktuara të Kushtetutës së Kosovës dhe të Konventës Evropiane për Mbrojtjen e të Drejtave dhe Lirive Themelore. Ndër të tjera, ai u ankua se monitorimi i bisedave të tija jo të privilegjuara ka cenuar të drejtën e tij për privatësi dhe disa aspekte të garantimit të gjykimit të drejtë.

Paneli përcaktoi se ankesa e Thaçit nuk ka demonstruar shkelje të së drejtës së tij kushtetuese për privatësi dhe rrjedhimisht vendosi se ky aspekt i referimit ishte i papranueshëm, në përputhje me rregullën 14(f) të Rregullores së Punës së Dhomës së Specializuar të Gjykatës Kushtetuese (“Rregullorja e DHSGJK”).

Më tej, Paneli konstatoi se ankesat e Thaçit lidhur me të drejtën për avokat dhe të drejtën për t’u mbrojtur në heshtje janë të papranueshme. Konkretisht, Paneli konstatoi se këto ankesa janë të parakohshme, duke pasur parasysh se nuk ka filluar asnjë procedurë gjyqësore në lidhje me këtë çështje dhe nuk ka pasur një vendim përfundimtar lidhur me akuzat. Rrjedhimisht, nuk janë shfrytëzuar të gjitha mjetet e mundshme juridike në përputhje me nenin 113(7) të Kushtetutës së Kosovës, nenin 49(3) të Ligjit dhe rregullën 14(f) të Rregullores së DHSGJK-së.

Hollësi të mëtejshme mund të gjenden në vendimin e Panelit. Ju lutemi vini re se referimi dhe parashtrimet lidhur me këtë çështje nuk janë ende të disponueshme për publikun.

Ju lutemi vini re se, përveç përmbledhjes të dërguar më herët, versioni i plotë i redaktuar publik i urdhrit për zhdëmtim në çështjen P. Shala është në dispozicion në anglisht.

Siç është njoftuar në kalendarin tonë, pushimi dimëror në DHSK fillon të hënën, më 23 dhjetor 2024, dhe përfundon më 10 janar 2025. Gjatë kësaj periudhe nuk mbahen seanca gjyqësore dhe disa nga shërbimet jothelbësore do të jenë në minimum. Megjithatë, gjykata mbetet plotësisht funksionale dhe puna vazhdon në të gjitha seksionet e DHSK-së. Gjatë pushimit mund të paraqiten parashtrime dhe përveç nëse gjykatësit kanë urdhëruar ndryshe, afatet gjyqësore vazhdojnë të jenë në fuqi.

Më 18 dhjetor 2024, Trupi Gjykues në çështjen Thaҫi dhe të tjerët miratoi kërkesën e Mbrojtësit të viktimave për të lejuar një anëtar të ngushtë të familjes të njërës prej viktimave, e cila ka ndërruar jetë së fundmi, të marrë pjesë si viktimë pjesëmarrëse në proces gjyqësor. Rrjedhimisht, numri i viktimave pjesëmarrëse në këtë çështje gjyqësore mbetet 154.

Pasi konfirmoi se i kupton kushtet dhe pasojat e marrëveshjes për pranimin e fajësisë, siç përcaktohet në rregullën 94 të Rregullores, Ismet Bahtijarit iu kërkua të deklarohet lidhur me pikat 2 dhe 3 të aktakuzës. Sot, ai u deklarua fajtor për të dyja akuzat, ndërsa seanca, e cila ka përfunduar, vazhdoi me trajtimin e pikave tjera të rendit të ditës.

Trupi Gjykues njoftoi se do të jetë në gjendje të vendosë në lidhje me të gjitha marrëveshjet për pranimin e fajësisë, përfshirë dënimin, vetëm pasi të marrë raportin nga Zyra e Pjesëmarrjes së Viktimave, që pritet të bëhet deri më 20 janar 2025 (siq kemi informuar dje) si dhe parashtrimet e palëve mbi raportin, që pritet të bëhet deri më 27 janar. Trupi Gjykues sqaroi se çdo zhdëmtim i mundshëm duhet të trajtohet si pjesë e marrëveshjeve për pranimin e fajësisë, në përputhje me rregullën 94 (2) (c) të Rregullores. Udhëzime të mëtejshme do të jepen nga Trupi Gjykues pas pushimit dimëror.