Aktuale

Pasi konfirmoi se i kupton kushtet dhe pasojat e marrëveshjes për pranimin e fajësisë, siç përcaktohet në rregullën 94 të Rregullores, Ismet Bahtijarit iu kërkua të deklarohet lidhur me pikat 2 dhe 3 të aktakuzës. Sot, ai u deklarua fajtor për të dyja akuzat, ndërsa seanca, e cila ka përfunduar, vazhdoi me trajtimin e pikave tjera të rendit të ditës.

Trupi Gjykues njoftoi se do të jetë në gjendje të vendosë në lidhje me të gjitha marrëveshjet për pranimin e fajësisë, përfshirë dënimin, vetëm pasi të marrë raportin nga Zyra e Pjesëmarrjes së Viktimave, që pritet të bëhet deri më 20 janar 2025 (siq kemi informuar dje) si dhe parashtrimet e palëve mbi raportin, që pritet të bëhet deri më 27 janar. Trupi Gjykues sqaroi se çdo zhdëmtim i mundshëm duhet të trajtohet si pjesë e marrëveshjeve për pranimin e fajësisë, në përputhje me rregullën 94 (2) (c) të Rregullores. Udhëzime të mëtejshme do të jepen nga Trupi Gjykues pas pushimit dimëror.

Ju lutemi vini re se pushimi i tanishëm (që filloi në orën 15:15 respektivisht në orën 16:00 në transmetimin me vonesë në internet) do të zgjasë më gjatë se që është njoftuar. Seanca do të vazhdojë në orën 16:15 (17:00 në transmetimin me vonesë).

Transkripti i informimit të sotëm javor të DHSK-së për median ndodhet këtu.

Ju lutemi vini re se transmetimi i seancës mbi marrëveshjen për pranimin e fajësisë, e cila do të mbahet sot në orën 13:00, do të bëhet me një vonesë prej 45 minutash. Klikoni këtu për të përcjellur transmetimin në shqip.

Informimi javor i radhës për median do të mbahet të enjten, më 19 dhjetor, në orën 14:30. Gjatë këtij informimi, zëdhënësit e DHSK-së do të japin një informacion të përditësuar mbi zhvillimet e fundit lidhur me procedurat gjyqësore dhe veprimtaritë e tjera publike të gjykatës. Gazetarët do të kenë mundësinë të bëjnë pyetje. Për të marrë pjesë, për çdo informim javor nevojitet regjistrimi paraprak. Ju lutemi dërgoni një mesazh elektronik me emrin dhe mbiemrin tuaj si dhe emërtimin e medias në [email protected](link sends e-mail). Afati i fundit për regjistrimin paraprak është çdo të enjte deri në ora 12:00. Detajet e platformës Zoom do të ju dërgohen pas regjistrimit paraprak. Regjistrimet e informacioneve të ofruara gjatë informimeve javore do të vihen në dispozicion në kanalin Youtube të DHSK-së.

Seancat lidhur me marrëveshjet për pranimin e fajësisë së Haxhi Shalës dhe Sabit Januzit kanë përfunduar. Të dy të akuzuarit konfirmuan se i kuptojnë kushtet dhe pasojat e marrëveshjes për pranimin e fajësisë, siç përcaktohet në rregullën 94 të Rregullores. Në vazhdim, Shalës dhe Januzit iu kërkua të deklarohen lidhur me pikat 2 dhe 3 të aktakuzës, për të cilat të dy u deklaruan fajtorë.

Lidhur me zhdëmtimet e mundshme në këtë çështje, Trupi Gjykues nxori një vendim gojor duke urdhëruar Zyrën e Pjesëmarrjes së Viktimave të Dhomave të Specializuara që të dorëzojë një raport deri më 20 janar 2025, duke detajuar të gjitha kërkesat e viktimave, nëse ka.

Siç ishte paralajmëruar, seanca për marrëveshjen e pranimit të fajësisë për Ismet Bahtijarin është caktuar për nesër, 19 dhjetor, në ora 13:00. Ndërkohë, siç theksohet në komunikatën e sotme për shtyp, janë bërë publike detajet e marrëveshjes së Bahtijarit për pranimin e fajësisë. Për më tepër, tashmë është në dispozicion versioni në gjuhën shqipe i marrëveshjes së Januzit për pranimin e fajësisë.

Pas shqyrtimit të marrëveshjes së re për pranimin e fajësisë mes ZPS-së dhe Mbrojtjes së Bahtijarit, Trupi Gjykues lëshoi ​​një urdhër gojor duke konstatuar se ajo është në përputhshmëri me kërkesat e rregullës 94 (2) të Rregullores. Rrjedhimisht, Trupi Gjykues caktoi seancën për të enjten, më 19 dhjetor, në ora 13:00, për të diskutuar marrëveshjen e re mes Bahtijarit dhe ZPS-së për pranimin e fajësisë. Orari i kësaj seance do të jetë sipas rendit të ditës të përcaktuar në paragrafin 20 të urdhrit më të fundit për caktimin për Januzin dhe H. Shalën. Zyra Administrative u udhëzua që të riklasifikojë marrëveshjen për pranimin e fajësisë në publike sa më shpejt të jetë e mundur.

Ju lutemi vini re se transmetimi i seancës mbi marrëveshjen për pranimin e fajësisë, e cila do të mbahet sot në orën 09:00, do të bëhet me një vonesë prej 45 minutash. Klikoni këtu për të përcjellur transmetimin në shqip.

Sot, më 17 dhjetor 2024, para gjykatëses së procedurës paraprake, Marjorie Masselot (Marzhori Masëlo), u mbajt konferenca e parë për ecurinë e çështjes në çështjen kundër Thaçit, Smakajt, Kilajt, Fazliut dhe Kuçit. Në përputhje me urdhrin e caktimit, gjatë kësaj seance të akuzuarve Thaçi dhe Smakaj iu dha mundësia që të deklarohen në lidhje me fajësinë ose pafajësinë e tyre. Meqenëse ata zgjodhën të mos e bënin këtë sot, gjykatësja Masselot përsëriti vendimin e saj të mëparshëm në urdhrin e caktimit, duke i ftuar ata të deklarohen në formë të shkruar deri më 7 janar 2025 në mesditë. Nëse kjo nuk bëhet brenda afait të caktuar, gjykatësja Masselot do të bëjë deklarimin në emër të tyre se janë të pafajshëm, në të njëjtën datë.

Sot, më 17 dhjetor, u bënë publike dy marrëveshje më vete për pranimin e fajësisë, ku Sabit Januzi dhe Haxhi Shala, secili më vete, pranuan fajësinë për një akuzë për pengim të personave zyrtarë në kryerjen e detyrave zyrtare dhe një akuzë për frikësim gjatë procedurës penale. Trupi Gjykues ka caktuar seancën për marrëveshjet për pranimin e fajësisë për 18 dhjetor, në orën 09:00, dhe ka rezervuar edhe 19 dhjetorin në qoftë se do të jetë e nevojshme.

Marrëveshja për pranimin e fajësisë mes Ismet Bahtijarit dhe Zyrës së Prokurorit të Specializuar ende nuk është bërë publike.

Më shumë hollësi në Komunikatën për shtyp.