Search

Gjykatësja Nina H. B. Jorgensen është profesore e të drejtës publike ndërkombëtare në Universitetin e Southamptonit që nga viti 2019 dhe ishte zëvendësdekane e Fakultetit Juridik (hulumtim) nga viti 2019 deri më 2021. Para kësaj ajo ka qenë profesore e të drejtës (2014-2018) dhe ndihmësprofesore e të drejtës (2010-2014) në Universitetin Kinez të Hong Kongut. Nga viti 2001 deri 2010, ajo ka punuar në detyra të ndryshme në Gjykatën Speciale për Sierra Leonen, ndër të cilat edhe si juriste e lartë për apelet dhe këshilltare e lartë juridike për Zyrën e Prokurorit, si dhe në Dhomat e Jashtëzakonshme në Gjykatën e Kamboxhias, dhe në Tribunalët Penalë Ndërkombëtare për ish-Jugosllavinë dhe Ruandën. Ajo gjithashtu ka punuar për Zyrën e OSBE-së për Institucione Demokratike dhe të Drejta të Njeriut në Varshavë si këshilltare juridike për Tolerancë dhe Mosdiskriminim. Ajo gjithashtu ka këshilluar OKB-në dhe organizatat joqeveritare për çështje të lidhura me të drejtën penale ndërkombëtare. Gjykatëse Jorgensen ka gradën doktor i shkencave prej Universitetit të Oksfordit dhe është diplomuar në Universitetin e Bristolit (MB). Ajo është pranuar në Shoqatën e Avokatëve të Anglisë dhe Uellsit (Gray's Inn) në vitin 1999 dhe e ka licencën si avokat. Ajo ka botuar gjerësisht në fushën e të drejtës penale ndërkombëtare dhe të drejtës procedurale procedurave.

Që prej vitit 2019, gjykatësja Masëlo është kryegjykatëse në Gjykatën Penale të shkallës së parë në Kolmar (Colmar) ku merret me krimin e organizuar dhe krimet seksuale. Që prej vitit 2023, gjykatësja Masëlo është emëruar në Ministrinë e Drejtësisë së Francës si zëvendësshefe e Zyrës për Çështje Diplomatike dhe Institucionale në Delegacionin për Çështje Institucionale dhe Diplomatike. Nga 2017 deri 2019, gjykatësja Masëlo ishte prokurore në Gjykatën Penale në Verdun. Më herët, gjykatësja Masëlo ka shërbyer në poste të ndryshme si juriste në Dhomën për Krime Lufte të Gjykatës Shtetërore të Bosnjë-Hercegovinës nga 2006 deri më 2008, në Tribunalin Penal të Kombeve të Bashkuara për Ruandën nga 2008 deri më 2009 dhe në Gjykatën Penale Ndërkombëtare nga 2009 deri më 2015. Gjykatësja Masëlo është magjistruar tri herë në juridik nga Universiteti Juridik në E-on-Provans (Aix-en-Provence) dhe nga Universiteti i Strasburgut. Gjithashtu, ajo ka botuar dhe ka ligjëruar në fushën e të drejtës penale ndërkombëtare.

Pas diplomimit nga Universiteti Nicolaus Copernicus në Torun në vitin 1978, gjykatës Hofmanski filloi karrierën akademike si asistent në katedrën e të drejtës së procedurës penale në këtë Universitet. Me përfundimin e studimeve të doktoratës në Torun (1981), filloi punën si profesor i jashtëm në katedrën e të drejtës së procedurës penale në Universitetin e Silezisë në Katovicë. Gjykatës Hofmanski kreu shkallën e dytë (habilitimin) në vitin 1989 dhe u emërua profesor në katedrën e së drejtës penale në Universitetin e Bialistokut. Midis 2000 dhe 2015, punoi si profesor në Universitetin Jagiellonski në Krakov, ku drejtoi katedrën e të drejtës së procedurës penale. Karrierën e gjykatësit e filloi në vitin 1994 në Gjykatën e Apelit në Bialistok dhe më pas, në vitin 1996, u emërua gjykatës në Dhomën Penale të Gjykatës së Lartë të Polonisë. Gjykatës Hofmanski mori pjesë në një numër projektesh të Këshillit të Evropës.

Nga marsi 2015 deri në mars 2024, gjykatës Hofmanski punoi në Gjykatën Penale Ndërkombëtare, ku ishte kryegjykatës i Dhomës së Apelit  dhe më pas Kryetar i Gjykatës Penale Ndërkombëtare  nga viti 2021 deri në vitin 2024. Gjykatës Hofmanski është aktualisht drejtor i Qendrës së Drejtësisë Penale Ndërkombëtare të themeluar rishtazi në Universitetin Jagiellonski në Krakov.

Gjykatës Hofmanski është autor i mbi 300 librave, shpjeguesve, artikujve për të drejtën kushtetuese, të drejtën penale, procedurën penale, bashkëpunimin ndërkombëtar në çështje penale dhe mbrojtjen e të drejtave të njeriut.