VIZITAT NË DHOMAT E SPECIALIZUARA TË KOSOVËS

Për shkak të pandemisë së Kovid-19 dhe si pjesë e masave të sigurisë që kanë marrë Dhomat e Specializuara të Kosovës (DHSK) për të zvogëluar rrezikun e përhapjes së virusit Kovid-19, vizitat në mjediset tona janë kufizuar përkohësisht.

Informacion i përgjithshëm

DHSK-ja mirëpret vizitorët që dëshirojnë të përcjellin seancat publike nga galeria e sallës së gjyqit. Gjithashtu, DHSK-ja u ofron studentëve dhe grupeve të tjera mundësinë të vizitojnë DHSK-në dhe të mësojnë më shumë për mandatin dhe proceset e saj. Gazetarët e akredituar janë të mirëpritur që të përcjellin seancat publike dhe të përdorin sallën e mediave për të punuar, ose për të shkëmbyer mendime me gazetarë të tjerë.

Dhomat e Specializuara dhe Zyra e Prokurorit të Specializuar të Kosovës ndodhen në: Raamweg 47, 2596 HN, Hagë

DHSK-ja dhe ZPS-ja janë përkushtuar që të ofrojnë mjedis të sigurt për të gjithë personat që hyjnë në objektet tona. Pandemia e Kovid-19 ka krijuar nevojën që të vendosim masa për të minimizuar rrezikun e infektimit të njerëzve në ndërtesë. Këto masa bazohen në këshillat e qeverisë holandeze dhe autoriteteve të tjera përkatëse.